Балтач заказнигы территориясендә 40 сыерчык оясы куйдылар

Әйләнә-тирә мохиткә сакчыл мөнәсәбәт тәрбияләү, укучыларның аны саклау өчен кирәкле белем һәм күнекмәләрен арттыру – өстәмә белем бирүнең аерылгысыз өлеше. Балтач ДТКЗ инспекторлары, Норма мәктәбе укучылары белән бергәләп, сыерчык оялары куюны оештырды. Кошлар өчен “өй”ләрне заказник территориясендә Балтач кишәрлеге урманчылыгының 105 кварталында элделәр. Чарада укытучылар да катнашты. Энтузиастлар барлыгы 40 оя куйды. Нәтиҗәле эштән соң, чарада катнашучылар табигать кочагында тәмләп чәй эчте.