Татарстан Республикасының Кукмара районында «Профессионаллар» һөнәри осталык чемпионатының «Урман таксациясе» компетенциясе буенча ярышлар узды
Кукмара муниципаль районы Лубян авылындагы Лубян урман-техник көллияте базасында һөнәри осталык буенча «Профессионаллар-2024» Бөтенроссия чемпионатының төбәк этабында «Урман таксациясе» компетенциясе буенча ярышлар узды. Билгеләп үтик, «Профессионаллар» хәрәкәтенең төп максаты – Россия икътисадының төрле тармакларын кадрлар белән тәэмин итүгә ярдәм итү, бу «Демография» илкүләм проектының «Мәшгульлеккә ярдәм итү» федераль проекты максатларына ирешүгә ярдәм итә.
Ярышларда көллият студентларыннан торган 5 команда катнашты. Баш эксперт булып укытучы Ринат Байгобулов, эксперт-методист – укытучы Рәсил Гайнанов, компетенция менеджеры – укытучы, М.В. Ломоносов исемендәге Төньяк (Арктика) федераль университетның Император Петр I технология көллиятенең технология бүлеге мөдире Александр Шишалов чыгыш ясады.
Шартларга ярашлы рәвештә, конкурсантлар 5 биремне үтәгәннәр: абрис һәм буссоль йөреше, диләнке таксациясе, матди бәя төзү, сынау мәйданын аерып чыгару һәм шытымнарны исәпкә алу.
1 апрель – дүшәмбе көнне ярышларга йомгак ясалачак һәм җиңүчеләрне бүләкләячәкләр.
Исегезгә төшерәбез, «Профессионаллар-2024» һөнәри осталык буенча Бөтенроссия чемпионатының төбәк этабы Татарстан Республикасында быелның 12 февраленнән 31 мартына кадәр 302 компетенция буенча 87 мәйданчыкта уза. Ярышларда барлыгы 2,2 мең кеше катнашачак.